#Фольклориада2020
#Посиделки в библиотеке#Народные обычаи#Продолжение акции"Покормите птиц зимой".
Әнәч авыл китапханәсендә "Фольклориада - 2020"һәм "Башкортстан республикасында торак пункларының эстетика елы"кысаларында "Мирас" клубында оештырылган чара кошлар ашату акциясенең дәвамы булды. Кошлар белән бәйле мәкаль, әйтемнәр, сынамыш - юраулар, табышмакларны искә төшердек. Халык авыз иҗатының алтын хәзинәсеннән булган "Сак - сок" бәетен тыңлап телнең илаһи көченә янә бер тапкыр инандык. Кошлар белән бәйле җырларны барладык та, җырладык та. Кошлар белән бәйләп, бергәләшеп, гел бер генә хәрефтән торган "Хикәя - бикәя" дә төзедек. Җанлы әңгәмә үзебез пешереп алып килгән ризыклардан әзерләнгән түгәрәк табын артында барды. Халкыбызда кошларга игътибар һәм ихтирам бик борынгы заманнардан ук килгән. Тормыш - көнкүрешебезне дә кошлардан башка күз алдына китерү дә мөмкин түгел. Халкыбызның күркәм бер йоласы - каз канаты суеру да кош - корт асрауга бәйле. Кич утырып, бергәләп сөйләшеп, җырлашып, хатирәләрне барлап каз канаты суердык. Чараны музыкаль яктан Финат абый Хәйбуллин бизәп, баянда уйнап торды. Кич утыруда катнашкан һәркем үзенә рухи азык алды: милли йолаларыбызны, халкыбызның тел байлыгын барладык. Әхлак, иман кагыйдәләрен искә төшереп, яшәү рәвешебезгә бәя бирдек. | 
